O gañador participará o 12 de agosto nun festival conmemorativo do Día Internacional da Xuventude

PONSE EN MARCHA O PRIMEIRO CONCURSO DE MÚSICA DE GRUPOS LOCAIS DE RIVEIRA PARA PROMOCIONAR ÁS BANDAS NOVEIS

Co obxectivo primordial de dar a coñecer entre a veciñanza o traballo despregado polas distintas bandas noveis do municipio, o Concello de Riveira organiza para os vindeiros días o Primeiro Concurso de Música de Grupos Locais de Riveira: unha iniciativa promovida polo Departamento Municipal de Xuventude que arrancará a partir de pasado mañá, mércores 28 de xullo de 2010, e se desenvolverá ao longo das vindeiras datas antes de que se inicien as Festas de Verán.

Vicente García como edil de Xuventude, acompañado polo técnico municipal Mario Vidal, foi o encargado de presentar este certame, que pretende servir como unha plataforma que lle brinde ás bandas locais inscritas no rexistro de grupos do Concello a oportunidade de divulgar  as súas creacións musicais logo do traballo realizado no local de ensaio municipal.

Van ser cinco as bandas que participarán no evento: Entrelíneas, Kolapz, La Banda del Watio, Pirufláuticos e Talón de Aquiles. As actuacións terán lugar en distintos locais hostaleiros do municipio, algúns dos cales aínda se están concretando (proximamente se enviará o calendario de actuacións).