Estimados veciños e veciñas:

Cada vez máis,  a vida, o mundo e as persoas xiran en torno a Internet. Trátase dun medio de comunicación esencial tanto para o traballo como para o ocio e o entretemento.

 

Estamos asistindo ao triunfo do individuo sempre conectado. 
O principal obxectivo deste Equipo de Goberno consiste en achegarse, decidida e firmemente, aos cidadáns, mellorando as canles de comunicación e facilitando as relacións entre o Concello e os veciños.

Por iso, agora dispoñemos deste novo espazo virtual para que desde calquera parte do mundo se poida coñecer a nosa Cidade, incorporando simultaneamente servizos de xestións para os veciños, que se irán ampliando, e que fundamentalmente van destinados a enriquecer a relación da Corporación cos cidadáns.

O ano 2006 foi histórico para Riveira, ao facérense os 100 anos da concesión do título de Cidade e pola visita das SS.MM. os Reis de España, que celebraron con nós esta conmemoración. O Centenario, que remata o 23 de marzo de 2007, está a servir para que nos sintamos, aínda máis, orgullosos da sermos riveirenses e para que Riveira sexa máis coñecida tanto en Galicia coma fóra dela.

Este novo portal web é un reflexo da nova Riveira do século XXI, unha fiestra que contribuirá a que o noso Concello sexa máis coñecido en todo o mundo, ao tempo que permitirá recoller as necesidades e propostas dos veciños para construír unha Cidade mellor, que é o noso obxectivo e o de todos e todas os cidadáns de Riveira.