O concello de Riveira pode estar orgulloso das súas praias, as súas xentes e as súas paraxes, pero os seus dons naturais non rematan aí, porque outra das marabillas coas que deleitarse no noso municipio é a serie de miradoiros que, situados en lugares estratéxicos, permiten divisar non só toda a extensión do concello senón ambas as dúas rías que o flanquean. As vistas coas que os nosos ollos poden recrearse son impresionantes e cada cume, cada miradoiro, ten o seu encanto especial, sen que a altura sexa o factor determinante. Os principais altos desde os que perder a ollada cara ao horizonte son os do Monte Tahúme, a Pedra da Ra, A Garita e Os Forcados. E, por suposto, hai que lembrar que un dos miradoiros de maior sona en Galicia, e particularmente nas Rías Baixas, é o da Curota; pertencente ao concello da Pobra, atópase a tan só 2 quilómetros de Riveira, continuando a estrada que conduce a Moldes.
