Castiñeiras

Unha das máis recentes no concello. Castiñeiras era parroquia eclesiástica desde 1967 e o templo principal foi a capela do colexio do Sagrado Corazón –establecido polas Irmás desta orde en Castiñeiras desde 1917– ata Maio de 1983, cando o prelado Antonio María Rouco Varela inaugura esta igrexa, deseñada polo arquitecto José A. Franco Taboada. De planta oval e aínda sen concluír, pois a parte exterior posterior está á espera de ser empedrada, a decoración interior garda relación coa cultura do traballo, e entre as pezas máis valiosas conta cun gran Cristo no retablo, obra de Alfredo de Santiago.

Subir

Igrexa Parroquial da Nosa Señora do Carme

Aguiño

Comezouse a súa construción en 1959, cando Aguiño se segrega como parroquia de San Paio de Carreira. O edificio, obra do arquitecto Antonio Tenreiro Bonachón, inaugurouse en 1967 e presenta unha disposición moi funcional, cunha lonxitude maior ao ancho có longo e un aspecto moderno. Ademais da inmellorable acústica, este templo sobresae pola súa capacidade: 500 persoas.

Subir

Oleiros

A antiga igrexa parroquial de San Martiño de Oleiros pasou a ser na actualidade unha capela da parroquia de Olveira. O templo primitivo debeu ser, coma na maior parte dos casos, románico. Desas datas sobreviviu unha escultura: unha Mater Dolorosa tallada en granito que se encontra nun dos muros do adro. No mesmo solar edificouse en 1769 outra igrexa de estilo neoclásico. Máis tarde, polo 1859, foi ampliada. A modo de curiosidade, pódese citar algunha copla popular dedicada a certo párroco que non pasou desapercibido para a fregresía: "o cura de San Martiño / éche moi bo confesor / que confesa ca criada / debaixo do cobertor".

Subir

Palmeira

Subir

Artes

Subir

Olveira

Construída no ano 1967, a imitación do estilo clásico, foi situada no lugar do Agra, unha rexión aproximadamente equidistante das dúas parroquias que foron fusionadas por tales datas: Oleiros e Olveira. Levantada en cantería sobre unha base en cruz, ten unha lonxitude duns 30 metros. No altar consérvanse unhas reliquias dos santos mártires de Nectario e Victorina, que datan do s. III.

Subir

Olveira

Un dos templos máis antigos en terras riveirenses, de orixe románica (recentemente foron achados unha cripta, cunha escaleira entre paredes, un Agnus Dei e dúas columnas cos seus capiteis que certificaban esta antigüidade). A última ocasión na que foi reconstruída lévanos ata o século XVIII, en concreto o 1742, como o indica a inscrición no arco da entrada, co cal queda encadrado no neoclásico. Situada nun outeiro de Olveira, asómase na cuíña para divisar toda a extensión da parroquia e incluso o parque Dunar. O adro foi utilizado como cemiterio e consérvase inzado de lápidas.

Subir

Carreira

O templo actual da Capela de San Paio, en Frións-Carreira, é de 1717; pero coñécese con certeza que no mesmo solar houbo outro, quizais románico. De estilo neoclásico e con cruceiro, atesoura varias lendas en torno del. Un incendio a comezos do s. XX queimou o primitivo retablo maior, barroco; un lóstrego xa destruíra a torre do campanario en 1818, e o canteiro que o refacía faleceu nun desafortunado accidente ao caer do tellado xusto antes de colocar o remate.

Subir

Riveira

O templo principal do concello de Riveira, de estilo neoclásico e erixido en 1864, foi deseñado por Faustino Domínguez. Veu substituír a antiga igrexa, situada na praza de Compostela (daquela coñecida como Praza da Constitución). Consta de 3 naves de bóveda de medio canón e foi reparada en varias ocasións nos últimos anos. Alberga no seu interior algunhas tallas de importancia, coma a do Sepulcro (elaborada en madeira de buxo e con incrustacións de prata), ou a de san Roque; de menor tamaño atopamos as figuras de san Miguel, san Andrés e san Bieito.

Algúns ornamentos (medallóns incrustados na parte posterior) no seu interior apuntan a unha posible orixe románica da igrexa. Posteriormente, realizouse a escalinata e mais a balaustrada. Xa en tempos do alcalde Ventoso Mariño, decorouse a praza e o adro cun xardín.

Subir