Bretal

A Capela da Nosa Señora da Angustia, situada no lugar de Bretal, pasa por un dos templos máis vellos do concello. Pertence á parroquia de Olveira e foi fundada en 1790, tal e como se le no frontispicio. A fundación correu a cargo de Roque Pillado de Orellán. Amosa leve espadana e ten a súa romaría o día da Asunción.
 

Subir

Sirves

A Capela da Nosa Señora dos Dolores foi erguida no ano 1869, no lugar de Sirves, en Olveira. Rodeada dun parque axardinado, presenta un aspecto óptimo logo de ser restaurada en 2002 polos alumnos da Escola Obradoiro de Cantería. Pódese observar un fornelo cunha Mater Dolorosa. Celébrase a romaxe o domingo in albis, unha semana despois da Pascua.
 

Subir

Carreira

É unha capela antiga e pequena que se ergue nunha elevación do terreo, a Toxeira de Entrematos, pouco pronunciada pero o suficiente como para que destaque entre o conxunto tan espallado de casas de Carreira. Descoñécese a data da construción, pero pode ser a supervivencia dunha ermida medieval. Consérvanse varias lendas arredor da súa orixe: unha conta que uns mariñeiros atoparon a imaxe da Virxe no mar e ao chegar fundaron o templo, que ao estar nun lugar silvestre, nun niño de aguias, gañou o nome co que chegou ata nós; outros aseguran que A Guía se refire a orientación e amparo para os homes do mar. Celébrase a romaría da Guía o luns de Pentecoste. O estilo da cachotería diluíuse un chisco debido a algunhas ampliacións a principios do s. XX.

Subir

Ermida de San Alberto

Riveira

Foi construída en honra de santo Alberto, protector de mariñeiros e de labregos, e no monte do mesmo nome, desde onde se observan vistas panorámicas privilexiadas. A súa orixe sitúase aproximadamente no s. XI, no románico, pero sufriu moitas reformas. Daquel estilo só mantén o presbiterio, cunha fiestra –agora tapiada– na ábsida con dous arcos de medio punto sobre columnas rematadas en capiteis a ambos os lados. A romaría campestre que se celebra arredor desta capela ten moita sona e aínda se practican algunhas tradicións.

Subir