Así, dedícase unha lembranza a todas as mulleres que no pasado, no presente e no futuro se ven na tensa conxuntura de agardar pola parella, ausente por motivos de traballo, ou, sendo máis explícito e por norma xeral en Riveira, por culpa do mar.

A dorna é unha embarcación ligada intimamente ao progreso da cidade de Riveira desde a súa humilde orixe mariñeira, e por isto se merece unha homenaxe coma a que se lle brinda no Parque Pedra Pateira, a carón da fonte circular que sobresae no centro da praza. Unha réplica en pedra e a tamaño natural dunha dorna dálle unha nova dimensión á importancia do parque desde que en 1998 se descubriu a placa deste monumento.

Esta escultura eríxese no cumio do rochedo do Castelo, no peirao da parroquia de Palmeira. Unhas escaleiras conducen a unha terraza, sobre os penedos, onde se levanta este fermoso monumento en pedra, inaugurado en 1998. Tres figuras humanas representan unha agridoce escena familiar: o home sinalándolle terras lonxincuas á muller, que trata de divisar o horizonte do futuro, mentres o meniño agatuña a pedra que serve de pedestal á procura dun seu pai do que só lle quedará a ausencia durante longo tempo.

O Monumento ao Mariñeiro atópase na explanada do porto de Aguiño, sobre unha ampla base cuberta de céspede. Inaugurado o día do Carme de 1995, rende homenaxe ás xentes do mar representadas nas figuras duns mariñeiros tallados en pedra, e que forman parte dunha escena cotiá do seu traballo como é a recollida das redes lanzadas ao mar.